मधेसखबर
वीरगन्ज,२९जेठ : भारतीय जनता पार्टी (भाजपा) ले आफूले सबै धर्म प्रति समान व्यवहार गर्ने बताएको छ । नेपाल र बेलायत सहित १३ मुलुकका राजदूतहरुसँगको संयुक्त भेटमा शनिबार भाजपाका अध्यक्ष जेपी नड्डाले उक्त कुरा बताएका हुन् ।
‘भाजपालाई बुझौं’ नाम दिएर नयाँ दिल्लीस्थित भाजपाको मुख्यालयमा राखिएको उक्त कार्यक्रममा भाजपाका विदेश विभाग प्रमुख विजय चौथाइवाले र भारत सरकारका विदेश मन्त्री एस. जयशंकर पनि सहभागी थिए ।पछिल्लो समय भारतमा धार्मिक असहिष्णुता बढेको भन्दै विश्वभरबाट अरोप लगाइरहेको अवस्थामा भाजपाले उक्त कार्यक्रम आयोजना गरेको हो । कार्यक्रममा भाजपाका अध्यक्ष नड्डाले आफ्नो पार्टीले सबै धर्मप्रति समान व्यवहार गर्ने बताए ।
केही समयअघि मात्र भाजपाकी प्रवक्ता नेत्री नुपूर शर्माले एक टेलिभिजन बहसमा र त्यसपछि अर्का पार्टीकै नेता एकाइका जिन्दलले इस्लाम धर्मावलम्बीको बारेमा नकारात्मक टिप्पणी गरेपछि भारत संकटमा परेको थियो । खासगरी मुस्लिम धर्म मान्ने खाडी मुलुकहरुले त भारतका राजदूतहरुलाई बोलाएर त्यस घटनाको बारेमा बुझेर आपत्ति समेत जनाएका थिए ।उक्त घटनालाई मध्यनजर गरेर भाजपाले ती दुई नेतालाई कारबाही समेत गरिसकेको छ । तर त्यसलाई थप प्रष्ट पार्नका लागि भाजपाले गृहकार्य गरेको हो ।
भारतका लागि नेपाली राजदूत शंकर शर्माले भाजपाको मुख्यालयमा भएको कार्यक्रममा अध्यक्ष नड्डाले भाजपाले भारतका सबै समूहहरुलाई समान रुपमा व्यवहार गर्ने बताएको जानकारी दिए । उक्त कार्यक्रममा शर्माले चाहिँ नेपाल र भारत बीचको अन्तरनिर्भरता रहेको उल्लेख गर्दै एक मुलुकमा समृद्धि भए अर्कोमा पनि त्यसको असर पर्ने बताएका थिए । साभार : कान्तिपुर
The post सबै धर्म प्रति समान व्यवहार गर्छौ : भाजपा appeared first on Madhes Khabar.