पर्सामा आत्महत्याको घटना बढ्दो , ११ महिनामा ७९ जनाले गरे आत्महत्या

मधेसखबर
वीरगन्ज,०२असार :पर्सा जिल्लामा आत्महत्याको घटना वर्षेनी बढ्दो क्रममा रहेको पाइएको छ ।जिल्ला प्रहरी कार्यालय पर्साका अनुसार चालु आर्थिक वर्षको साउन देखि जेठ सम्म ११ महिनामा पर्सामा ७९ जनाले आत्महत्या गरिसकेका छन् ।

तीमध्ये ६९ जनाले झुन्डिएर अर्थात पासो लगाएर आत्महत्या गरेका हुन् भने १० जनाले विष सेवन गरि आत्महत्या गरेका हुन् । यहि अवधीमा पासो लगाएर ८ जनाले र विष खाएर आत्महत्या गर्न खोज्ने १ सय ४ जना रहेका छन् ।
गत आर्थिक वर्षमा भने पर्सामा १ सय २० जनाले आत्महत्या गरेका थिए । तीमध्ये १ सय ४ जनाले झुन्डिएर आत्महत्या गरेका थिए भने १५ जनाले विष सेवन गरेर आत्महत्या गरेका थिए । त्यसअघिकोे आर्थिक वर्ष २०७६÷०७७ मा भने ९५ जनाले आत्महत्या गरेका थिए ।

प्र्साका प्रहरी प्रवक्ता प्रहरी नायव उपरिक्षक ओमप्रकाश खनालका अनुसार आत्महत्या गर्नेमा बढी महिला रहेका छन्  । महिलामध्ये अविवाहित÷नाबालिका पनि रहेका छन् । आत्महत्या गर्ने विवाहिता महिलाहरुमा लैंगिक हिंसामा परेकाहरू, दाइजो तथा घरेलु हिंसापीडितहरू बढी हुने गरेका छन् । नाबालिकाहरूले प्रेमसम्बन्धमा असफलता र निर्णय क्षमताको कमीको कारण पनि आत्महत्याको बाटो रोज्ने गरेको पाइएको खनालले बताए ।आत्महत्या गर्ने पुरुषहरुमा बेरोजगारी, नैराश्य, साइबर बुलिंगका कारण प्रेम सम्बन्धहरू सार्वजनिक हुने लगायतका रहेको खनालले बताए ।

वीरगन्जका मानसिक रोग विशेषज्ञ डा. भरत गोइतका अनुसार , सहनशीलताको कमी, आत्महत्यालाई निरुत्साहित गर्न सरकारीस्तरबाट कुनै प्रयास नहुनु जस्ता कारणले आत्महत्याको घटना बर्सेनि बढ्दो क्रममा रहेको छ । खासगरि मधेसमा आत्महत्या गर्ने सोच आएका व्यक्तिलाई रोक्न वा सुझाव दिन कुनै सोधपुछ केन्द्र, मानसिक अस्पताल वा टोल फ्रि नम्बर आदि नरहेको उनले बताए । मानसिक तनाव भएका तथा लागूऔषध सेवनकर्ताहरूले पनि आत्महत्या गर्ने सम्भावना बढी रहेको उनको भनाइ छ ।

The post पर्सामा आत्महत्याको घटना बढ्दो , ११ महिनामा ७९ जनाले गरे आत्महत्या appeared first on Madhes Khabar.