बारा २ : एमालेबाट पूर्वमन्त्री पौडेलसहित ३ जनाको नाम सिफारिस

बारा,१८चैत : बारा क्षेत्र नंबर २ मा हुन लागेकाे उपनिर्वाचनका लागि नेकपा एमालेले पूर्वमन्त्री पुरुषोत्तम पौडेलसहित ३ जनाको नाम सिफारिस गरेको छ। एमाले जिल्ला कमिटी बाराले पोलिटव्युरो सदस्य समेत रहेका पौडेलसहित राजेश साह र बन्दना सिंहको नाम सिफारिस गर्ने निर्णय गरेको हो।

 

साह एमाले प्रदेश कमिटी सदस्य र सिंह अनेमसंघ बाराकी अध्यक्ष हुन्।

२०७०मा बाराकाे तत्कालीन निर्वाचन क्षेत्र नंबर ६ बाट संविधानसभा सदस्यमा निर्वाचित भएका पौडेल त्यसयता चुनाव लडेका छैनन्। उनी सुशील कोइराला नेतृत्वको सरकारमा युवा तथा खेलकुद मन्त्रीसमेत रहेका थिए।

सप्तरी २ बाट पराजित जनता समाजवादी पार्टीका अध्यक्ष उपेन्द्र यादवले बारा २ बाट चुनाव लड्ने प्रबल सम्भावना भएपछि एमालेले हेभिवेट उम्मेदवारका रुपमा पौडेललाई अघि सारेको हो।

यसणतै बारा २ मा लोसपाबाट राजेन्द्र महतोको नाम चर्चामा छ। लोसपाले महतोलाई बारा २ बाट उम्मेदवार बनाउने आन्तरिक तयारी गरिरहेको छ। मंसिर ४ काे निर्वाचनमा महतो सर्लाही २ बाट पराजित भएका थिए।

यसैगरी जनमत पार्टीबाट शिवचन्द्र कुशवाहा उम्मेदवार बन्ने निश्चित छ। नेकपा माओवादी केन्द्रका कुशवाहा हालका उपराष्ट्रपति यादवसंग पराजित भएका थिए। उपनिर्वाचनमा माओवादी केन्द्र र कांग्रेसले जसपा अध्यक्ष यादवलाई सघाउने संकेत पाएपछि कुशवाहा जनमत पार्टी प्रवेश गरेर उम्मेदवार बन्न लागेका हुन्।

रवि लामिछाने नेतृत्वको राष्ट्रिय स्वतन्त्र पार्टीबाट रमेश खरेल उम्मेदवार बन्ने तयारीमा छन्। काठमाडौं १ बाट पराजित खरेललाई स्वतन्त्र पार्टीले उम्मेदवार बनाउन लागेको हो। खरेल काठमाडौं १ मा नेपाल सुशासन पार्टीबाट उम्मेदवार थिए ।

The post बारा २ : एमालेबाट पूर्वमन्त्री पौडेलसहित ३ जनाको नाम सिफारिस appeared first on Madhes Khabar.