वीरगन्जमा पनि मनाइयाे विश्व क्षयरोग दिवस

मधेसखबर

वीरगन्ज,१०चैत : विश्व क्षयरोग दिवस शुक्रबार वीरगन्जमा पनि विविध कार्यक्रम गरी मनाइएकाे छ । ‘हो हामी क्षयरोग अन्त्य गर्छौ’ भन्ने नाराका साथ वीरगन्ज महानगरपालिकाको जन स्वास्थ्य प्रवर्द्धन शाखाले शुक्रबार विभिन्न कार्यक्रम गरि दिवस मनाएकाे हाे ।

दिवसकाे अवसरमा बिहान घण्टाघर चाेकबाट सचेतनामुलक रयाली निकालिएकाे थियाे । उक्त रयाली आदर्शनगर हुदै नगर परिक्रमा पछि पुन घण्टाघर फर्किएर कोणसभामा परिणत भएको थियो ।

रयालीमा सहभागी भएका स्वास्थ्यकर्मीले सचेतनामुलक प्लेकार्ड बोक्नुका साथै क्षयराेग सम्बन्धि सचेतनामुलक सन्देश लेखिएका पम्पलेट वितरण समेत गरेका थिए ।

महानगरकाे स्वास्थ्य शाखामा कार्यरत तथा क्षयरोग रोकथामका फोकल पर्सन सुमनचन्द्र ठाकुरको संयोजकत्व र वीरगन्ज महानगरपालिका स्वास्थ्य शाखाका प्रमुख रितेश जैसवालकाे प्रमुख आतिथ्यतामा भएकाे रयालीमा स्वास्थ्य कार्यालय पर्साका विनोद झा, नारायणी अस्पतालका डाक्टर उदयनारायण सिंह, बिजामका अनोज खडका लगायतको पनि सहभागीता थियो ।

महानगरमा रहेका ३४ वटै स्वास्थ्य संस्थामा पनि सचेतनामुलक कार्यक्रम गरि विश्व क्षयरोग दिवस मनाइएकाे क्षयरोग रोकथामका फोकल पर्सन सुमनचन्द्र ठाकुरले जानकारी गराए ।

क्षयरोग माईकोब्याक्टेरियम ट्युबरक्लोसिस नामको ब्याक्टेरियाका कारण लाग्ने रोग हो । श्वासप्रस्वासका माध्यमबाट सजिलै सर्ने क्षयरोगको संक्रमण मधुमेह, एचआईभी, मिर्गौला प्रत्यारोपण गरेका, क्यान्सर जस्ता प्रतिरोध क्षमता कम भएका रोगीलाई छिटो हुने गर्दछ ।

नेपालमा क्षयरोगबाट प्रत्येक दिन करिब ४७ जनाको मृत्यु हुने गरेको छ । यस्तै दैनिक १ सय ९० जना हाराहारीमा क्षयरोगीका नयाँ बिरामी थपिने गरेका छन् । राष्ट्रिय क्षयरोग नियन्त्रण केन्द्रका अनुसार मुलुकमा हाल १ लाख १७ हजार क्षयरोगका विरामी छन् भने वर्षेनी ६९ हजार नयाँ विरामी थपिने गरेका छन् ।

नेपालमा क्षयरोका कारण वर्षेनी १७ हजार जनाले ज्याउन गुमाउनु परेको केन्द्रको तथ्याङक छ । विश्वमा भने वार्षिक १ करोड व्यक्तीलाई क्षयरोगको संत्रमण हुने गरेको छ भने १५ लाख जनाले क्षयबाट ज्यान गुमाउने गरेका छन् ।

The post वीरगन्जमा पनि मनाइयाे विश्व क्षयरोग दिवस appeared first on Madhes Khabar.