पर्सा-१ मा कस्ले जित्ला ? तथ्यांकले भन्छ प्रदीप नै अगाडि

वीरगन्ज, ०७ कार्तिक : पर्साको क्षेत्र नम्बर १ को चुनावी प्रतिष्पर्धा यपालि निक्कै रोचक हुने देखिएको छ । बजारका चोक, चिया पसलमा यहाँको चुनावी परिणाम के हुने हो भन्ने बारे अहिलेदेखि नै चर्चा परिचर्चा सुरु हुन थालेको छ । पूर्व वन तथा वातावरणमन्त्री प्रदीप यादवको क्षेत्र रहेकाले पनि यहाँको चुनावी माहोल रोचक बनेको हो ।

कतिपयले निवर्तमान सांसद् प्रदीप यादवले पुनः नतिजा दोहोर्‍याउन सक्ने अड्कल गरिरहेका छन् भने कतिपयले यो क्षेत्रले अहिलेसम्म दोहोर्‍याएर कसैलाई नजिताएको भन्दै इतिहासले निरन्तरता पाउने आंकलन गरिरहेका छन् ।

अहिले यस क्षेत्रबाट जसपा-एमाले गठबन्धनको साझा उम्मेदवार रुपमा जसपाका नेता प्रदीय यादव चुनावी मैदानमा छन् भने लोकतान्त्रिक बाम गठबन्धनको तर्फबाट लोकतान्त्रिक समाजवादी पार्टीका नेता लक्ष्मणलाल कर्ण छन् । यस्तै अन्तिम समयमा पार्टीबाट टिकट नपाएपछि वर्षौ नेपाली कांग्रेसको राजनीतिमा सक्रिय पार्टीका पूर्व जिल्ला सभापति सभापति नै रहेका अजय द्विवेदी बागी उम्मेदवारको रुपमा मतदाता माझ पुगिरहेका छन् ।

यस क्षेत्रमा प्रतिनिधीसभा सदस्यका लागि पार्टीगत र स्वतन्त्र गरी २१ जनाको उम्मेदवारी परेको छ । उमेदवारी २१ जनाको परेपनि प्रतिस्पर्धा भने त्रिपक्षीय हुने निश्चित छ । आउँदो मंसिर ४ गते हुने मतदानले निवर्तमान सांसद् प्रदीप यादवलाई नै अनुमोदन गरेर नयाँ इतिहास बनाउँछ कि क्षेत्र नम्वर १ को पुरानो इतिहासलाई निरन्तरता दिन्छ त्यो भने हेर्नै बाँकी छ । तर यहाँ हामीले यो क्षेत्रमा २०७४ को निर्वाचन अनि भर्खरै सम्पन्न २०७९ को स्थानीय तहको निर्वाचनमा दलहरुले प्राप्त गरेको मतका आधारमा हुनसक्ने संभावित परिणाम केलाउन खोजेका छौँ ।

२०७४ को अवस्था

२०७४ को निर्वाचनमा तत्कालिन संघीय समाजवादी फोरमका उम्मेदवार रहेका यादव निकटतम प्रतिष्पर्धी नेपाली कांग्रेसका उम्मेद्वार अनिल रुंगटालाई ४ हजार ६५१ मतले पराजित गर्दै पहिलो पटक संसद् भवनको यात्रा तय गरेका थिए ।
यादवले २१ हजार १३२ मत ल्याउँदा रुङ्गटाले १६ हजार ४८१ मत ल्याएका थिए भने एमालेका विचारी यादव ५ हजार ४८८ मत मै समेटिन पुगेका थिए ।

२०७० को दोस्रो संविधानसभाका लागि भएको निर्वाचनमा एमालेका उम्मेदवार विचारी यादवसँग भोगेको पराजयको परिणाम २०७४ को निर्वाचनमा प्रदीप यादवले उल्ट्याउँदै संसद् भवन छिरेका थिए । विचारी भने त्यो निर्वाचनमा तेस्रो स्थानमा पुगेका थिए ।
अहिले भने यी नै विचारी र प्रदीप एक ठाउँमा छन् । प्रदीप प्रतिनिधिसभा सदस्य उम्मेदवार हुँदा विचारी प्रदेशसभा सदस्यको उम्मेद्वार बनेरसँगै घरदैलो गरिरहेका छन् । अनिल रुङटा भने चुनावी दौडबाट बाहिरिँदै समानुपातिक तर्फ पुगेका छन् ।

२०७९ को स्थानीय तहको परिणाम

पछिल्लो पटक २०७९ मा भएको स्थानीय तहको निर्वाचनमा पनि यो क्षेत्रमा जनता समाजवादी पार्टी (तत्कालिन संघीय समाजवादी फोरम) कै पक्कड बलियो देखाएको छ ।

वीरगन्ज महानगरपालिकाको १९ वटा वडा समेटिएको यो क्षेत्रमा ८ वटा वडा जसपाले जितेको छ । ६ वटा एमाले, ४ वटा कांग्रेस र एउटा वडामा मात्रै लोकतान्त्रिक समाजवादी पार्टीले जितेको छ ।

यो हिसाबले पनि जसपा एमाले गठबन्धनको जोड्दा १४ वटा वडा पुग्छ भने सत्तारुढ गठबन्धन कांग्रेस र लोकतान्त्रिक समाजवादी पार्टीको ५ वटा मात्रै पुग्छ ।

वडा अध्यक्षहरुले पाएको कुल मत जोड्दा पनि जसपा एमाले गठबन्धन नै भारी देखिन्छ । जसपा एमालेका वडा अध्यक्षहरुले यस क्षेत्रका वडाहरुमा पाएको मत जोड्दा ३२ हजार देखिन्छ भने कांग्रेस र लोसपा, माओवादी केन्द्र र नेकपा एसको जोड्दा पनि २० हजार पुग्न मुस्किल छ ।

यो त भयो गएका निर्वाचनहरुमा पाएको मत परिणामको प्राविधिक पक्ष । अहिलेका मतदाता पार्टी भन्दा उम्मेदवार हेरेर मत दिने बढेका छन् । विगतमा पार्टीकै पक्षमा मतदान गर्नेहरु अब भने उम्मेदवारको योग्यता र क्षमता हेरेर मत दिन थालेको तथ्य गत स्थानीय तहको निर्वाचनमा आएको परिणामले संकेत गरिसकेको छ । त्यसमाथि क्षेत्र नम्बर १ का मतदाता चलायमान रहँदै आएको विगतको परिणामले पनि देखाएको छ ।

अंकगणितीय हिसाबमा जसपा-एमाले गठबन्धनका उम्मेदवार प्रदीप यादव फराकिलो अन्तरका साथ अघि देखिरहँदा सत्तारुढ गठबन्धनतर्फ लोकतान्त्रिक समाजवादी पार्टीका उम्मेद्वार लक्ष्मणलाल कर्ण भने उनी भन्दा निक्कै पछि देखिन्छन् ।

दुवै गठबन्धनका रुष्ट फकाउँदै द्विवेदी

यसमा पनि सत्तारुढ गठबन्धनलाई चुनौति दिँदै बागी उठेका अजय द्विवेदी त्यही भित्रबाट मत तान्ने कसरतमा छन् ।
गठबन्धनमा रहेको कांग्रेसका जिम्मेवार नेताहरु नै द्विवेदीको पक्षमा मत माग्दै हिँड्नुले कर्णलाई घात हुने निश्चित देखिन्छ । द्विवेदीको मत माग्दै यहाँका काँग्रेस महाधिवेशन प्रतिनिधि, पार्टीबाट स्थानीय तहमा जितेका कार्यपालिका सदस्यहरु नै हिँडिरहेका छन् ।
अर्को जसपा एमाले गठबन्धनमा पनि अन्तर्घात हुने यदकदा सुनिने गरेको छ । दुबै गठबन्धनका असन्तुष्ट र अन्य मतदाताको मन जित्ने ध्याउन्नमा बागी उम्मेदवार द्विवेदी लागेको देखिन्छ । त्यसैले यस पटकको चुनाव निकै रोचक देखिन्छ ।

कामको मूल्यांकन गर्ने विश्वास लिएको छु : यादव

जसपा एमाले गठबन्धनका उम्मेदवार प्रदीप यादव आफूले पहिलो कार्यकालमा गरेको कामलाई देखेर मतदाताले पुनः निर्वाचित गराउने विश्वासमा छन् । कार्यकालको अन्तिममा वन तथा वातावरणमन्त्रीसमेत बनेका यादवले यस क्षेत्रको वडा नम्वर ३२ मा नेपालकै ठूलो चिडियाघर बनाउने महत्वकाक्षी योजना कार्यान्वयनमा ल्याएका छन् ।

कार्यकालमा बाटो, नाला तथा यस क्षेत्रको भौतिक विकासमा योगदान दिएको सम्झँदै गर्न बाँकी काम अझै रहेकाले मतदाताले पुनः निर्वाचित गराउनेमा उनी विश्वस्त देखिन्छन् । पार्टीगत रुपमा र गठबन्धनको हिसाबमा पनि बलियो रहेको र काम गरेर पनि देखाएकाले आफ्नो जित निश्चित रहेको उनी बताउँछन् ।

पर्सा जिल्लालाई सँधै उचो राख्ने काम गरेको छु : कर्ण

यता सत्तारुढ पाँच दलीय गठबन्धनका उम्मेदवार लक्ष्मणलाल कर्णले एउटा क्षेत्रको लागि मात्रै नभई आफूले पर्सा जिल्लाको नाम चिनाउने गरी काम गरेकाले मतदाताले फेरि पनि आफूलाई नै जिताउने बताउँछन् ।

यस अघि पर्सा क्षेत्र नम्बर ४ बाट विजयी भएका उनी सिट बाँडफाँडमा क्षेत्र नम्वर १ लोसपाको भागमा परेपछि अहिले १ को उम्मेदवार बन्न आइपुगेका हुन् । अहिलेको लडाई प्रतिगमन विरुद्धको लडाई भएकाले संविधान र संघीयता रक्षाका लागि पनि मतदाताले आफूलाई नै विजयी बनाउने उनको विश्वास छ ।

मेरो प्रतिस्पर्धा कर्णसँग होइन प्रदीपसँग मात्रै : द्विवेदी

यता बागी उम्मेदवार द्विवेदी भने जितको आधार सत्ता गठबन्धनको मत नै भएको बताउँछन् । ‘सत्ता गठबन्धनको मत कर्णलाई जाँदैन,’ उनी भन्छन्, ‘लामो समयसम्म मैले पार्टीप्रति देखाएको इमान्दारिताको मूल्यांकन मतदाताले गर्ने छन्, गठबन्धनेको मत पनि मलाई नै आउने छ ।’

यस्तै अर्को गठबन्धनमा पनि थुप्रै असन्तुष्ट मतदाताले आफूलाई नै मत हाल्ने उनी बताउँछन् । ‘अर्को गठबन्धनका थुप्रै असन्तुष्ट मतदातालाई मैले भेट्दा उहाँहरु पनि मलाई नै मत हाल्न तम्तयार हुनुभएको पाएँ,’ यसले जितको झनै सुनिश्चितता गरेको छ ।’

आफूलाई टिकट नदिएर क्षेत्र नम्बर ४ को व्यक्तिलाई क्षेत्र नम्बर १ को टिकट दिइएपछि अन्यायको प्रतिकार गर्न आफूले उम्मेदवार दिएको पनि उनी बताउँछन् ।

उनले आफ्नो प्रतिस्पर्धा कर्णसँग नभई प्रदीप यादवसँग भएको बताउँदै अन्तिममा आफूले नै जित्नेमा विश्वास व्यक्त गरे ।

गठबन्धनले राजनीतिलाई बन्धक बनाइदिएको तर्क गर्दै उनले लोकतान्त्रिक सिद्धान्तको विरुद्धमा गरिएको गठबन्धन मतदाताले मान्नु पर्छ भन्ने नरहेको बताए ।

The post पर्सा-१ मा कस्ले जित्ला ? तथ्यांकले भन्छ प्रदीप नै अगाडि appeared first on Madhes Khabar.