इँटाभट्टामा जिउँदै मान्छे जलाउने कांग्रेस नेता अफताब आलमका भाइ मेहताब आपराधिक गतिविधिमा अझै सक्रिय

मधेसखबर

वीरगन्ज,०१असार :जिउँदै इँटाभट्टामा मान्छे जलाएको अभियोगमा पुर्पक्षका लागि थुनामा रहेका अफताब आलमका भाइ मोहम्मद मेहताब कारागारभित्रैबाट पनि आपराधिक गतिविधि गरिरहेका छन् । उनले रौतहटका एमाले नेता किरण साहलाई ज्यान मार्ने धम्की दिएको खुलासापछि प्रहरीले अनुसन्धान सुरु गरेको छ । साह मेहताबविरुद्धको मुद्दाका साक्षीको पक्षमा बोल्दै आएका छन् ।

जिल्ला प्रहरी कार्यालय रौतहटले प्रहरी निरीक्षक विन्देश्वर यादवको नेतृत्वमा पाँचजनाको विशेष समिति गठन गरेको यसबारे अनुसन्धान गरिरहेको छ । एमाले नेता साहले मेहताबबाट ज्यान मार्ने धम्की आएको भन्दै सोमबार जिल्ला प्रशासन कार्यालयमा निवेदन दिएका थिए । त्यसपछि प्रहरीले घटनाको अनुसन्धान सुरु गरेको हो । प्रहरीले साहको सुरक्षाका लागि बडीगार्डसमेत खटाएको छ ।

रौतहटका एसपी विनोद घिमिरेले ज्यान मार्ने धम्की दिएको घटना बाहिरिएपछि अनुसन्धान सुरु गरिएको बताए । ‘मेहताब गौरस्थित कारागारमा छन् । उनले जेलभित्रैबाट ज्यान मार्ने षड्यन्त्र गरेको भन्दै हामीकहाँ निवेदन आएको छ । यसमा हामी संवेदनशील छौँ । घटनाको अनुसन्धान सुरु भइसकेको छ । केही दिनभित्रै तथ्य बाहिर आउला,’ उनले भने ।

साहले २७ चैत ०६४ मा रौटहटको राजापुरमा भएको विस्फोटका साक्षीको पक्षमा बोल्दै आएका छन् । निर्वाचन प्रभावित पार्ने उद्देश्यसहित आलमले बम बनाइरहेको ठाउँमा अघिल्लो साँझ विस्फोट भएको थियो । विस्फोटमा परी स्थानीय युवा पिन्टु भनिने त्रिलोकप्रताप सिंह र मोहम्मद ओसी अख्तरसहित अन्य युवाको समेत मृत्यु भएको थियो । त्यही  घटनाका अभियुक्तमध्येका एक हुन्– मेहताब । जिप्रका रौतहटमा परेको निवेदनअनुसार मेहताबले साहलाई मार्न जेलभित्रै कैद सजाय भुक्तान गरिरहेका नन्दु साह, छोटेलाल साह र सुरेन्द्र बैठालाई अह्राएका थिए ।

त्यही  घटनापछि सुरेन्द्रले जेलभित्रकै दुईवटा मोबाइल नम्बर प्रयोग गरी ज्यानको सुरक्षा गर्न भन्दै साहलाई फोन गरेका थिए । घटना लिक गरेको थाहा पाएपछि मेहताबले जेलभित्रकै अन्य कैदीबन्दी प्रयोग गरी छोटेलाललाई निर्घात कुटपिटसमेत गरेका थिए । घाइते छोटेलालको उपचार गर्न उनकी श्रीमतीले जिप्रका रौतहटमा निवेदनसमेत दिएकी थिइन् ।

‘मेहताबले मेरो ज्यान मार्न जेलभित्रै कैदीबन्दीलाई सुपारी दिएको मैले थाहा पाएँ । यस विषयमा जेलभित्रकै एक कैदीबन्दीले मलाई टेलिफोन गरे,’ साहले भने, ‘जसको रेकर्ड मसँग अझै छ । खबर लिक गरेको अभियोगमा मेहताबले एकजनालाई निर्घात कुटपिट गरेछ । त्योसमेत गोप्य राखिएको रहेछ । उनकी श्रीमतीको निवेदनपछि उनको उपचार हुने भएको छ ।’

त्यही मुद्दामा पुर्पक्षका लागि हाल नख्खु कारागारमा रहेका अफताबका चुनावी प्रतिस्पर्र्धी समेत हुन् एमाले नेता साह । २०७४ को संसदीय निर्वाचनमा उनी अफताबका निकटतम प्रतिद्वन्द्वी थिए । त्यसवेला साह जनता समाजवादी पार्टीबाट रौतहट– २ बाट निर्वाचनमा उठेका थिए । पछि उनी एमालेमा प्रवेश गरेका थिए ।

जिल्ला अदालत रौतहटको आदेशपछि अफताब आलम अहिले पुर्पक्षका लागि नख्खु कारागारमा छन् । तर, उनको आतंक अझै जारी छ । उनीविरुद्ध घटनामा ज्यान गुमाउनेमध्येका पिन्टु भनिने त्रिलोकप्रतापका बुबा श्रीनारायणको कानुनी लडाइँ अझै पनि जारी छ । अर्का मृतक ओसी अख्तरकी श्रीमती अमना खातुनले भने आलमविरुद्धको बयान फेरेकी छिन् । बम विस्फोटको १२ वर्षपछि रौतहट प्रहरीले घटनालाई नयाँ ढंगले अनुसन्धान गर्‍यो । २६ असोज ०७६ मा आलम पक्राउ परेका थिए । साभारः′नयाँपत्रिका

The post इँटाभट्टामा जिउँदै मान्छे जलाउने कांग्रेस नेता अफताब आलमका भाइ मेहताब आपराधिक गतिविधिमा अझै सक्रिय appeared first on Madhes Khabar.