मुख्यमन्त्री राउत भन्छन् :जिम्मा दिए प्रदेश सरकारले किसानलाइ समयमै मल उपलब्ध गराउछ

मधेसखबर
वीरगन्जज,२९जेठ : मधेस प्रदेशका मुख्यमन्त्री लालबाबु राउतले संघीय सरकारले किसानलाइ समयमै मल उपलब्ध गराउन नसक्ने हो भने यसको जिम्मा प्रदेश सरकारलाइ दिनु पर्ने माग गरेका छन् ।

महोत्तरी चेम्बर अफ कमर्सले शनिबार साँझ बर्दिबासमा आयोजना गरेको ‘युवा उद्यमशीलतामा स्थानीय सरकारको भूमिका’ विषयक अन्तक्रिया कार्यक्रमलाई सम्बोधन गर्दै मुख्यमन्त्री राउतले यस्तो माग गरेका हुन् । उनले भने,‘ मधेस प्रदेशको समृद्धिको मुख्य आधार कृषि हो भन्ने कुरामा सबै सहमत छौँ, तर मलखाद, बीउबिजन समयमा किसानलाई दिनसकेका छैनौँ , यदि संघीय सरकारले समयमा मलखाद , बीउबीजन उपलब्ध गराउन नसक्ने नै हो भने अब यसको आपूर्तिको जिम्मा प्रदेश सरकारलाई दिनुपर्छ , प्रदेश सरकार यो जिम्मा लिन तयार पनि छ ।

मुख्यमन्त्री राउतले प्रदेशको आर्थिक अग्रगतिको मुख्य आधार कृषि भएको हुँदा यसको आधुनिकीकरण र सुविधा वृद्धि पहिलो आवश्यकता बनेको बताए ।समयमा मलखाद, बीउबीजन र सिँचाइको सुविधा पु¥याउन सके किसानको जीवनस्तरमा सुधार र मुलुकको आर्थिक उन्नतिमा टेवा पुग्ने उनले बताए । उनले मलखाद समयमा नपाएर किसानले खेतीका बेला बर्षेनी रुनु पर्ने अवस्था दुःखदायी भएको बताए ।

आफुले कहिल्यै समयमा मलखादको प्रबन्ध गर्न नसक्ने र त्यो अभिभारा विकेन्द्रित पनि नगर्ने संघीय सरकारको अड्डीले कृृषि सामग्रीको आवश्यकता समयमा परिपूर्ति हुन नसकेको उनको भनाइ छ । मुख्यमन्त्री राउतले मुलुकमै कृषि उद्योग स्थापनाका लागि लगानी बढाउने वातावरण सरकारले बनाउनुपर्ने उल्लेख गरे । मधेस सरकारले प्रदेशभित्र कृषिजन्य उद्योग खोल्न चाहनेलाई २० वर्षसम्म कर नलिने र जग्गा लिजमा उपलब्ध गराउने कानुन नै बनाएको जानकारी उनले गराए ।

The post मुख्यमन्त्री राउत भन्छन् :जिम्मा दिए प्रदेश सरकारले किसानलाइ समयमै मल उपलब्ध गराउछ appeared first on Madhes Khabar.