वीरगन्जमा तीनदिने “रात्री बजार” सफल भएकाले यसलाई निरन्तरता दिने मेयर सिंहको घोषणा

मधेसखबर
वीरगन्ज, ३बैशाख : सुस्त भएको वीरगन्जको व्यपार व्यवसाय चलायमान बनाउने उदेश्यले पहिलो पटक आयोजना गरिएको “रात्री बजार” सफल भएको भन्दै वीरगन्ज महानगरपालिकाले यसलाई निरन्तरता दिने भएको छ ।

नयाँ वर्षको उपलक्ष्यमा वीरगन्ज महानगरपालिकाले चैत ३० देखि बैशाख २ गते सम्म तीनदिन पहिलो पटक “रात्री बजार” लगाएको थियो ।वीरगन्जमा पहिलोपटक लगाइएको “रात्री बजार” मा उत्साहजनक जनसहभागीता र व्यपार भएका कारण आफुहरुको उदेश्य सफल भएको भन्दै मेयर राजेशमान सिंहले “रात्री बजार” लाई निरन्तरता दिने बताएका हुन् ।

उनका अनुसार , वीरगन्जमा अब हरेक महिनाको अन्तिम शुक्रबार र शनिबार गरि दुई दिन “रात्री बजार” लाग्नेछ । यहि बैशाखको ३० र ३१ गते पनि दुई दिन “रात्री बजार” लगाउने उनले बताए ।

मेयर सिंहले भने,‘ हामीले पहिलोपटक परिक्षणका रुपमा तीनदिने “रात्री बजार” लगाएका थियौं , यो तीन दिनको “रात्री बजार” मा भएको जनसहभागीता र व्यपारको कारोबारबाट हामी हौसिंएका छौंं , त्यसैका कारण यसलाई निरन्तरता दिन लागेका हौं ।

“रात्री बजार” व्यवस्थापन समितिका संयोजक जयप्रकाश खेतानलले तीनदिने “रात्री बजार” मा करिब ३ लाख मानिसले सहभागीता जनाएको बताए । उनले भने,‘ जितपुर , सिमरा र हेटौंडाबाट समेत मान्छेहरु यहा आएका थिए, भारतका सीमावर्ती शहरहरुबाट पनि पाहुनाहरु आएका थिएइ ।

“रात्री बजार” बिहारको रक्सौल , मेतिया , मोतीहारी र मुजफरपुरबाट गरि ५० हजार भारतीयहरुहरु आएको उनले बताए । तीनदिनको “रात्री बजार” मा भारतीयहरुलाई लक्षित गरि भारतबाट नेपाल प्रवेश गर्ने वीरगन्ज स्थित मुख्य नाका तीन दिनका लागि २४ सै घण्टा खुल्ल गरिएको थियो ।

तीन दिनको “रात्री बजार” मा ठूला होटल र रेष्टुरेन्ट बाहेक बजारमा लगाइएका स्टलहरुमा झण्डै तीन करोड रुपैयाको कारोबार भएको पनि उनले बताए ।

उनले भने,‘ टेबुल र ठेलामा चाट , छोला भटुरा र पानीपुरी बेच्ने साना व्यपारीले मात्रै दिनको ३०÷३५ हजारको व्यपार गरेका छन् , ठूला होटल र रेष्टेरेण्टको समेत जोड्ने हो भने ४ करोड जतिको कारोबार भएको होला ।

मेयर सिंहले पहिलोपटक तीन दिनका लागि आयोजना गरिएको “रात्री बजार” मा देखिएको उत्साजनक जनसहभागीताले कम्तिमा हप्ता वा महिनामा एकपटक अबेररात सम्म बजारमा घुमफिर र रमाइलो गर्दै किनमेल गर्न वीरगन्जवासीले चाहिरहेको पुष्टि भएको बताए ।

यसका साथै यहाका व्यपारीलाई रातिको समयमा पनि सुरक्षित वातावरणमा व्यपार व्यवसाय गर्न सकिन्छ भन्ने वातावरण पनि तीनदिनको “रात्री बजार” ले निर्माण गरिदिएको उनले बताए ।

मेयर सिंहले भने,‘ कामकाजी शहरवासी हप्ता वा महिनामा एकपटक भएपनि रातिमा बजारमा निस्किएर खुल्ला जीवन जिउन चाहेको कुरा यो तीनदिने “रात्री बजार” ले देखियो , त्यसका कारण अब यो “रात्री बजार” लाई निरन्तरता दिन्छौ ।

नयाँ वर्षको स्वागतमा वीरगन्ज महानगरपालिकाले वीरगन्जमा पहिलो पटक सन्चालन गर्न लागेको “रात्री बजार” का लागि चैत ३० देखि बैशाख २ गते सम्म वीरगन्ज नाका २४सै घण्टा खुल्ला रहने भएको हो ।

तीनदिनको “रात्री बजार” मा आदर्शनगर चोकदेखि कैलाश होटल चोक हुदै पुरानो बसपार्क र चिल्ड्रेन पार्क सम्मको सडकमा खानाका परिकार , लत्ताकपडा , जुत्ताचपल, मसाज , पेयपदार्थ , विभिन्न समुदायका सांस्कृतिक झाँकी लगायतका गरि १ सय भन्दा बढि स्टलहरु राखिएको थियो । “रात्री बजार” मा राखिएका स्टल र बजार लगाइएको आदर्शनगर क्षत्रेका पसलहरु राति २ बजे सम्म खुल्ला गरिएको थियो । यसका साथै पुरानो बसपार्कमा अबेरराति सम्म सांगीतीक कार्यक्रम पनि प्रस्तुत गरिएको थियो ।

 

The post वीरगन्जमा तीनदिने “रात्री बजार” सफल भएकाले यसलाई निरन्तरता दिने मेयर सिंहको घोषणा appeared first on Madhes Khabar.