वीरगन्जमा ८ करोडको लागतमा खुल्यो साहसिक खेल खेल्ने पार्क

मधेसखबर
वीरगन्ज,१० पुस: साहसिक र रमाइलो अनुभव खोजी गर्नेहरुका लागि वीरगन्जमै साहसिक पार्क संचालनमा आएको छ ।

वीरगन्ज महानगरपालिकाको वडा नम्वर १४ बाइपासको बोलबम पेट्रोल पम्प नजिक संचालनमा ल्याइएको ‘वल्र्ड अण्डर’ पार्कमा रोमाञ्चक र साहसिक खेलले आनन्द लिन सकिने छ ।

आर्थिक नगरि वीरगन्जमा दिन विताउनका लागि आवश्यक घुमफिर गर्ने स्थान अभाव रहेकोमा अब यो पार्क संचालनमा आएसँगै वीरगन्ज घुम्न आउने तथा यहीका स्थानीयका लागि पनि समय बिताउन सहज हुने भएको छ ।

डेढ विघा जग्गामा ८ करोड रूपैयाको लगानीमा वीरगन्जका पाच जना व्यवासीले पार्क सन्चालनमा ल्याएका हुन् । आइतवार वीरगन्ज महानगरका मेयर राजेशमान सिंहले विधिवत पूजापाठ गरेर पार्ककाे उद्घाटन गरेका छन् ।

पार्कमा विभिन्न प्रकारका साहसिक खेलका साथै आकर्षक सजिसजावट गरिएको छ । पार्कमा जिपलाइन, स्काई साइकल, मल्टिपल रोप कोर्स, र्यापेलिङ र वाल क्लाइम्बिङ जस्ता साहसिक खेलको अनुभव लिन सकिने पार्कका सन्चालक साैरभ केडियाले बताए ।

पार्क सन्चालनमा आएसंगै अब वीरगन्ज बाहिर गएर यस्ता खेलको अनुभव लिनुपर्ने बाध्यता हटेको केडियाले बताए ।

५ जना व्यवसायीको संयुक्त लगानीमा संचालनमा ल्याइएको यो पार्कमा साहसिक खेलका साथै रोमाञ्चक बहु खेल मैदान पनि रहेको छ । जसमा फुटसल, टेनिस, भलिबल र क्रिकेट खेलको अत्याधुनिक सुविधा पनि लिन सक्ने केडियाले बताए ।

पार्क भित्र छिरिसकेपछि खाजा नास्ताका लागि यहाँ घुम्न आउनेहरु बाहिर निस्कनु नपर्ने गरी व्यवस्था मिलाइएको छ । आवश्यक खानेकुरा तथा पेय पदार्थ पार्कभित्रै स्टलमा प्राप्त गर्न सक्ने गरी व्यवस्था मिलाइएको अर्का संचालक दीपक वैद्यले बताए ।

मेयर सिंहले यस्ता पार्कले घुम्न आउनेका लागि समय व्यतित गर्ने ठाउँ मात्रै नभई रोजगारी सिर्जना गरेर अर्थतन्त्र चलायमान बनाउने विश्वास रहेकाे बताए ।

उद्घाटन कार्यक्रममा वीरगन्ज महानगरपालिकाका प्रमुख प्रशासकीय अधिकृत लक्ष्मी प्रसाद पौडेल, उद्योगी अशोक वैद्य, सौरभ केडिया, आरोह मित्तल, हेमंत बेद, सनी अग्रवाल लगायतको पनि उपस्थिति थियो ।

The post वीरगन्जमा ८ करोडको लागतमा खुल्यो साहसिक खेल खेल्ने पार्क appeared first on Madhes Khabar.